Bismillahir-Rahmənir-Rahim,
Əs-sələmu aleykum va rahmətullahi va bərəkətuhu.
Hər ilin 18 dekabrında qeyd edilən dəyərli ölkəm Qətərin Milli Günü münasibətilə əlahəzrət Əmir Şeyx Təmim bin Hamad Al Tani cənablarına (Allah onu qorusun), ata Əmir Şeyx Hamad bin Xəlifə Al Taniyə, əlahəzrət Əmirin müavini, Şeyx Abdullah bin Xəlifə Al Taniyə və xeyirxah Qətər xalqına ən xoş arzularla ən səmimi təbriklərimi çatdırmaqdan xoşbəxtəm.
Bu ilki bayramımız bütün dünya üçün korona pandemiyasının yaratdığı qeyri-adi bir şəraitdə qeyd edilir. İzzət və Cəlal sahibi olan Allaha dua edirik ki, bu bəlanı tezliklə bizim hamımızın üzərindən götürsün.
Budur, dünya bu pandemiyadan qurtulmanın yaxınlaşmaqda olması, yeni ilimizin isə xeyir, təhlükəsizlik və əmin-amanlıq ili olacağı və hamıya sağlamlıq gətirəcəyi ümidi ilə yaşayır.
Ölkəm Qətərin Bakıdakı səfiri kimi, fürsətdən istifadə edərək iki ölkə başçısının rəhbərliyi altında bizimlə Azərbaycan Respublikası arasındakı möhkəm bağlantı və əsaslar üzərində qurulmuş, xalqlarımızın xeyrinə və mənafeyinə xidmət edən, müştərək maraqlar və qarşılıqlı hörmət və ehtirama söykənən özəl əlaqələri yüksək qiymətləndirirəm. Həmçinin bu əlaqələrin daha geniş perspektivlərə doğru inkişaf etdirilməsindəki bu istəyimizi bir daha təsdiqləyirəm.
Bakı şəhərində Qətər Dövlətinin Milli Günü münasibətilə düzənləməyə adət etdiyimiz tədbirlərlə əlaqədar bu il Milli Günü virtual qeyd etmək və Qətər Dövlətinin bütün sahələrdə çiçəklənməsinin ən mühüm təzahürlərini Bakı şəhərindəki ən böyük reklam lövhələrinin ekranlarında nümayiş etdirməklə kifayətlənməli olduq.
Sonunda diqqətiniz üçün təşəkkür edir, hamınıza uğur və müvəffəqiyyət diləyirəm.
Bayramınız mübarək!